[مناكفات]

كنوز نت - شعر:عاطف ابو بكر/ابو فرح

١-

فصائلنا دَكاكينْ

وِالمُنتمي إلْها مَسكينْ

بِتْغمِّزْلَكْ عاليسارْ

وِبْتِدْخلَّكْ عاليمينْ

٢-

لا تْصدِّقْ منْهمْ كلامْ

وَلا حكِي بالإعْلامْ

خُذْ تنْظيرْ حتّى تْدوخْ

وْبالأفْعالْ يا حَرامْ

٣-

وْعِنَّا يلِّي اسْمو اليسارْ

كٰذْبِهْ كْبيرِهْ معْ. إشْهارْ

ماشي وَرا أخْصامو

وْسياسِتْهُمْ باخْتصارْ

٤-

ما بعرفْ أعْتَبْ على مِينْ

عاليسارْ ولّا اليمينْ

بَعْتبْ أكثرْ عاليسارْ

باعوا أفكارَكْ لِينينْ

٥-

أمَّا عشانْ فلسطينْ

كُلُّو ماشي عاليمينْ

والكلّْ ظابِبْ سْلاحو

وعالتحريرْ مشْ سائْلينْ

٦-

عِنَّا جبْهاتِ بْفلسطينْ

بِتْكَفِّي روسِّيِّا والصينْ

بالجزائرْ كانْ فصيلْ

وِالبرَكِهْ عِنَّا عشرينْ

٧-

إحْنا ثورهُ سبْعِ نْجومْ

وهالحكي إلْنا معلومْ

وْعنَّا عشرينْ أمينْ عامْ

وِجْهِ الواحَدْ مِثْلِ البُومْ

٨-

أحزابِ الفكِّهْ بالسودانْ

بالمِجاهرْ ما بتْبانْ

بالحكي الجيشِ الأحمرْ

لو تِقْرا إلْها بَيانْ

٩-

وْأحزابِ المنسفْ بعمّانْ

تِسعِ رْجالْ معِْ نسوانْ

وْلمَّا الحزِبْ يِتْوسَّعْ

بِلَمْلِمْ أربعْ جيرانْ

١٠-

 وْنفْسِ الْشي بْفلسطينْ

 عنَّا جَبْهاتِ المقلوبِهْ

إلْهمْ وُزَرا و،،و،،و،،ودكاكينْ

وِبلادي بيهِنْ منكوبِهْ

١١-

في فصائلْ مشْ موجودِهْ

لكنْ إلْها وزاراتْ

وِالعضوِيِّهْ مفقودِهْ

وْلا تْصدِّقِ البياناتْ

١٢-

في دَكاكينْ مِنْ سنَواتْ

ما رَمَتْ صِفِرْ طلقاتْ

لكنْ إلْها وزاراتْ

وْإلها سُفَرا بْسفاراتْ

١٣-

وْعندي عيلِهْ كْبيرِهْ كْثيرْ

وْكلّْ فخِدْ بدُّو وزيرْ

يعني نصِّ الوزارهْ

للعيِلِهْ أقلّْ تقديرْ

١٤-

محسوبهْ هايِهْ الفصائلْ

عنْدِ الضرورهْ أصواتْ

إرْفعْ إيِدَكْ بِرْفعْها

وْبالمقابِلْ وَزاراتْ

١٥-

بالساحهْ عشرينْ فصيلْ

يِمْكِنْ هالعدَدْ قليلْ

شي يسارُ وْشي يمينْ

بِتِّفْقوا على التدْجيلْ

١٦-

قَبْلِ التحريرْ مِنْقِسْمينْ

وْبدلِ الدولِهْ في ثِنْتينْ

كلْ واحدْ دُولْتو أشبارْ

ما بْتِصْلحْ لمَقْبرتينْ

١٧-

باللهِ يا مِخْتِلْفينْ

على إيشْ مِخْتِلْفينْ

ما بصَدِّقْ لوْ قُلْتولي

مِخْتلفينْ عَ فلسطينْ

١٨-

لوْ عليها اخْتلفتوا

كانْ زمانْ تْوَحَدْتو

وْيلِّي بِقُلِّي غلطانْ

بلْعَنْ بَيُّو على سِتُّو

————————-