لا ننسى اننا اخوة

كنوز نت - قلنسوة - بقلم : الناشطة شفاء حرزالله

المعركة الانتخابية في عامنا هذا..

انا ما بحب احكي كثير بالسياسه ولا ملمة فيها كثير ،بس انا بضل بنت هالوطن وهالبلد ودمي عروقوا عربية اصيلة،،

وما فيي ما يكونلي لفتة بهذا الموضوع الي اصبح حساس كثير بهاي الايام لدرجة كثير كبيرة.

احنا بنمر بفترة كثير عصيبة ودامية وازمة بس ربنا اعلم لوين راح توصل بينا وايمت بتخلص.

لهيك مش لازم نكون احنا كمان حبل يلتف عرقاب بعض نخنق في بعض لاجل امور مش دايمه لحد هي منصب يوم الك ويوم عليك ..فتره الك وفترة لغيرك

لهيك لازم يكون عنا هاي القناعة وهاي الايمان بهيك اشي

ولو دامت كان دامت للانبياء والخلفاءوغيرهم ..

الحكاية ما بدها كل هالكره والاحقاد والضغينة بدك تركب هالسفينة بدك تكون قبطان ذكي وحكيم وتعرف كيف تقود الامور بعقلانية وترمي كل السلبيات ببحر بعيد كثير لحتى تقدر توصل لشط الامان..

فترة زمنيه وراح يقترب يوم الانتخابات وتعلن النتائج ويبان كلشي ..

بتمنى ما نرجع لمسلسل الدم الاحمر والطخ والتهديدات والحرق ليش بس لانه ما نجحنا وما اخذنا هيك منصب ..

اخسر حياتي وحياة غيري واعيش بخوف ورعب كبير انا وعيلتي وولادي عشان اي منصب ومكانه ..

يا ريت نفكر شوي ونتأنى وما ننسى انه احنا اخوة دمنا واحد ودينا واحد وعرقنا واحد .

يا ريت نرجع ونكون بسيطين ما يغرنا مناصب ولا مصاري ولا اي اشي نعيش حياة صغيرة وقصيرة باشيا حلوة قبل لا يفوتنا القطار وما نلحق ننبسط او نعيش اشي حلو