كنوز نت - بقلم الاعلامي : علي التيتي

ذاكرة وطن: البعنه

الالاف في تشييع جثمان معمرة الشاغور عن عمر105 سنين

  • وداعا يا امي-7-12-2023.
كنوز نت - بقلم الاعلامي : علي التيتي -شيع الشاغور والقضاء الفلسطيني بمشاركة من الجليلين والكرمل والساحل جثمان الحاجه نوخه اسماعيل تيتي ام سعيد الى مثواه الاخير، والدة الاعلامي والكاتب الرفيق علي تيتي من البعنه.

وقد أبن ورثا العديد من الشخصيات الوطنيه والدينيه المغفور لها بحضورهم الى بيت العزاء بمسجد الروضه.
هذه الام التي حملت هموم شعبها وسيرورة قضية التهجير بما مثلته التغريبه الفلسطينيه.
  • وقد اجريت معها هذا اللقاء قبل رحيلها بشهرين.

  • حجه مساء الخير
 مساء النور يما الله يرضى عليكوا
  • حجه قديش عمرك؟
انا عارفه يما كل جيالي ماتوا بتقولوا 105
  • ان شاء الله عقبال ال120.
لا يما
بتمنى من ربي يموتني وارتاح وأريحكوا
هذه هي الام وفي هذا العمر تفضل راحة اولادها عن راحتها
  • يما قديش خلفتي (انجبتي)؟
.خلفت 5 اولاد و4 بنات 
  •  احكيلي شو بتتذكري بحياتك وما شاء الله عنك واعية سمع، ورؤيا، وعقل منيح
اه يا يما انا وعيت ثورة فلسطين ال 36 كانت البعنه بلد صغيره بيوتها سطح واحد ملتصقه ببعض وكان لكل عيله شباك اسمه باب السر.
  •  شو هذا باب السر؟
يا يما اي اعتداء او سرقه او هجوم من العدو نتناقل الخبر لبعض ما في تلفون مثل اليوم

  • قلتي لبيوت ملتصقه ببعض وسطح واحد تسهروا مع بعض كيف هذه البيوت؟
كنا قبل الشتاء احنا الصبايا لما كنا صبايا ننزل على المحفره شرقي البلد نحفر بالقدوم ونجيب تراب ابيض كلسي نذوبه بالمي ونطين لبيوت والسقفيه كانت من اخشاب .
  • طيب وين كانت الرجال؟
اللي سارح بالماعز والغنم والبقر، واللي بقطع حجار من المحاجر، واللي بحراث الارض
شو كانت الناس عايشه ومبسوطه على الزراعه وتربية المواشي، والطيور
  •  يا حجه كيف تعرفتي على ابوي؟
 ههههه انا لا بعرفه ولا عمري شفته. حتى ابوك ما بعرف ابوه يللي اخذه جيش تركيا وما رجع
كان هذا القاروط سارح بالبقر وفي بالبعنه غربي البلد بركه تشرب منها المواشي، واحنا البنات نروح نعبي مي بتناك نحملها عروسنا للشطف، وغسيل الصوف ، وغسل الاواني النحاسيه.
ابوك اتحركش فيي وحاول يرمي التنكه عن راسي
وهيك اجوا الختياريه وامه لعند ابوي وحكى فيي وابوي اسماعيل لحسين التيتي عنده 6 بنات وولد واعطاني لابوك
كما اعطى بناته ال 5 لقرايبه في العيله ما كان يقبل يزوج بناته خارج العيله
  •  ممكن تحكيلنا عن هاي الثوره اللي سموها 36?
 هاي يما اليهود والانكليز بدهن يوخذو اراضينا ويسكنوا اليهود ما قبلنا وصار مناوشات بين شباب فلسطين وبينهم حتى ابن عمي سعيد محمد سعيد التيتي استشهد بمعركة وادي عامود ما بين ميرون وصفد وطلعنا جبناه ودفناه بمقبرة البعنه القديمه.
  •  شو كان دور النساء بالثوره؟
نعمل اكل ونوديلهم مي ونوخذ ملابسهم نغسلها ونغنيلهم نشجعهم .
  • يا الله كانت حياتكن صعبه ومريره؟
صحيح بس كانت الناس تحب بعضها وامان اكثر من اليوم.
كان هذا ولا شي بالنسبه لاحتلال اليهود 48
  • كيف يعني؟
 أخ الله لا يعيدها عليكو يما.
  •  احكيلي
 في 48 بشهر 10 دخلوا اليهود البعنه والدير (دير الاسد) في ساحه كبيره (بيدر)
نادى الناطور منع تجول واخذونا هناك من فوق ال 17 مع الرجال لحال، ونحن النساء والاطفال لحال
واهل كفر عنان وفراضيه ونحف جابوهم لساحة عين مجدلكروم قتلوا 7 وطردوا الناس على لبنان (هذا ما رواه لي رئيس مجلس مجدالكروم سابقا محمد مناع ابو العز)
  •  انتم اهل البعنه والدير شو عمل معاكوا جيش الاحتلال؟
 يا يما جاييتلك بالحكي اختاروا 4 من بين الرجال يجيبوا مي من العين التحتى
2 من البعنه
واحد مسيحي اسمه حنا فرهود
واحد مسلم اسمه علي عابد
و2 من دير الاسد
واحد اسدي اسمه احمد اسدي
والاخر ذباح اسمه صبحي ذباح
  • يا الله شو هالصدفه هاي؟
خبرني المرحوم حنا ابراهيم الياس كان معهم دليل عميل مش صدفه
وقتلوهم بالدم البارد فخاف الناس 
والشي الاخر كان عملية قتل لم تتم بالقرب من مقام الشيخ محمد عبد القادر الجيلاني الاسدي اصله من العراق
اذ كانت القنابل تخرج من الفوهه للاعلى وحين توجيهها للناس لم تخرج القنابل وقلبت المصفحه وقتلت الجندي.
  • طيب شو كمان؟
 اخذوا الرجال كاسرى حرب الى مدخل البعنه دير الاسد لشارع 85 ومن هناك للمعتقلات
نهلال
صرفند
عتليت
والنساء والاطفال تم طردهم بقول الجنود يلا روحوا عند عبدالله( ملك الاردن).
توجهنا شرقا الى تله ما بين نحف والبعنه ونحن ننوح ونبكي ومعاي اربع اطفال اكبرهم 8 سنوات واصغرهم على صدري عامين.
ومرت اخوي معاها 2 وعصدرها واحد
تبين لها انها الوساده وليس صغيرها فرجعت الى بيتها فاحضرته ومن هنا التغريبه الى عين ساجور

والحق يقال اهل ساجور الطائفه المعروفيه استقبلونا وضيفونا واعطونا خبز الصاج (الشراك)
واستمرينا بالمشي لعين الصرار بالرامه ومن الرامه الى بيت جن ومن بيت جن الى الرميش في الجنوب اللبناني نمنا هناك .
  •  يا يما كنت ماشيه ام بالمواصلات؟
هو كان سيارات يما كله مشي على الاقدام
  •  وصلتي قرية الرميش في جنوب لبنان ..كان معك طعام او شراب؟
لا يما كان معاي مصاري افوت على الدكاكين واشتري
  • في الجنوب اللبناني كيف كانت معاملتهم معك؟
 ما كانت منيحه دخلت بيت واخوتك معاي اسقيهم مي
اخذت بريق فخار سقيتهم ، صاح علي صاحب البيت وكسر البريق.
  • ليش ما رجعتي لفلسطين من هذه اللحظه?
استمريت مشي وبعض الاحيان بسيارات لطرابلس شمالي لبنان.
  •  كم شهر بقيتوا في لبنان؟
 قعدنا 6 شهور
  •  بعد طرابلس وين روحتوا ؟
اجينا بيروت وبعدين صيدا،وبعدين صور وبصور التقيت مع اهل الشاغور والساحل واختي فاطمه.
  • شو صار مع اختك فاطمه؟
شوف يما ولاد اختي وين اليوم ببلاد جوا
  • شو يعني بلاد جوا؟
محمود بالمانيا الله يرحمه
محمد (ريحان) باميركا
سعيد بالسويد
علي باسبانيا
نجوى ونجاح في الكويت
زهره بالاردن
  • هل في تواصل بينك وبينهم؟
محمود كان هون وانا زرته بالمانيا الله يرحمه
سعيد كان هون
وعلي انت بتحكي معاه على التلفون
ومحمد التقينا معاه بالحج بالسعوديه
اما البنات بعرفش عنهن شي
  •  واختك وزوجها؟
اختي توفت باحداث الحرب الاهليه بلبنان ٧٦ طلعت تشتري لولادها قناص قوسها وماتت الله يرحمها
وزوجها كمان توفى
  • كيف كانت معاملة سكان المدن معك؟
 مش منيحه قعدت بلبنان 6 شهور ومعاي مصاري
قررت العوده لفلسطين.
  • كيف كانت عودتك من طرابلس الى بيروت، وصيدا، وصور؟
 بالترين (القطار).
  • قررتي ترجعي على فلسطين ليش ما رجعت اختك فاطمه معك؟
 رفضت وقالت لي يا خيتي بدك تقتلي ولادك على الحدود عند اليهود؟
  • رجعتي فلسطين كيف؟
اجيت على عرب العرامشه شمال فلسطين وفي الصباح كملت حتى كفر سميع شافني الخوري وسألني من وين انت
اجبت من البعنه واجيت من لبنان
استقبلنا وفي الصباح ارسل معنا دليل لدير الاسد
وما زالت علاقتنا بأبناء الخوري جيده وشاء القدر ان تتزوج ابنه له عنا بالبعنه.
  • هل كان ناس في البعنة عندما وصلتي؟
 اجيت وكان ناس وعم بفرقوا قسائم هويات زرقاء مش الهويات الحمره (الاقامه المؤقته.
ويعود هذا لفضل الشيوعيه بالبعنه ومحامي الارض حنا نقاره
وكنا نغني بالاعراس بقيادة جميله عابد تيتي
طارت طياره من فوق الليه
الله ينصركو يا شيوعيه
حنا نقاره جاب الهويه
غصب عن رقبة ابن غريونا
فسجلت نفسي واولادي فعملت في فبركة الشحاط الكبريت بشارع بن عامي بعكا وطلع زوجي اخذ هويه وبقينا تحت الحكم العسكري لغاية الستينات من القرن الماضي
وزودونا من منظمة الامم المتحده في البداية
بالاعاشه(المؤن الشهريه على حسب عدد الانفار)
وهيك يما
بقينا انا وابوك نشتغل وعيشناكم 
وبسنة 61 صادروا ارضنا وبنوا مدينة كرمئيل
وابوك ما قبل لا يبيع ولا يبدل لليوم
وارضنا زرعناها زتون والحمد لله 
بقينا وعشنا بتعبنا
يا حجتي اتمنى لك الصحه وعقبال ١٢٠

الله يرحمها ويسكنها فسيح جناته