قصائد من ديوان "أغاني على الطريق"
للشاعر د. اسامة مصاروة 

نفسي أحب
نفسي أحب يا ناس نفسي
نفسي أحب وانسى نفسي
نفسي أحب وانسى نحسي
وانسى عذاب أمسي ويأسي
نفسي أحب بسّ الاقيك
يا اللي ليالي بحلم بيك
نفسي أشوفك وراعيك
نفسي أضمك ولاغيك
نفسي أحب وقول للكون
حبي وهب لك طعم ولون
نفسي أحب وعيش مفتون
بأحلى بدر وأحلى عيون
نفسي أحب لأبعد حد
لسنين طويله ملهاش عد
نفسي أحب حب ولا حد
من قبل مني عرفو بجد
نفسي أحب واشكر ربي
نفسي أحب من كل قلبي
نفسي أعيش وياك حبي
وانسى معاك يأسي وغلبي

مش هسامحك
مش هسامحك يا حبيبي
يا اللي قلبك خان هوايا
مش هصالحك لو نصيبي
كان في بعدك طول شقايا
مش هسامحك مهما تحكي
مهما تشكي ومهما تبكي
مش هصالحك مهما تنفي
ومهما توعد بكره توفي
مش هسامحك ياللي قلبك
باع غرامي وباع حناني
مش هصالحك ياللي حبك
ضاع وضيّع لي زماني
مش هسامحك ياللي غدرك
خلّى هجرك طال وصدك
مش هصالحك ياللي كبرك
خلّى عندك زاد وبعدك
مش هسامحك لو دموعي
جرّحت خدّي وضلوعي
مش هصالحك رغم حبي
رغم ودي وعشق قلبي

زمن سعيد
عشان حبيبي صار أكيد
بينا الغرام واصبح شديد
عشان حقيقي بات سعيد
قلبي اللي كان قبلك شريد
هرقص وغني للزمان
اللي بهواك أصبح أمان
هرقص وغني للحنان
اللي تملا بدفؤوالمكان
ليل الجراح يا قلبي راح
لمّا الصباح بنوره لاح
حتى النسيم بالعطر فاح
لمّا الحبيب بالحبّ باح
دلوقتي بس بعد الضنا
حضن الهوى هيضمنا
دلوقتي بس بعد اللقا
كل المنى هتكون لنا
يا خساره بس على السنين
اللي انقضت شكوى وأنين
وخساره ع القلب الحزين
اللي انكوى بنار الحنين

إشاعات
ياما سمعت عنك كلام
ياما وصل منك ملام
ياما الإشاعه عذّبت
قلبي وياما تعّبت
قال إيه غرامك يا جميل
صعب المنال أو مستحيل
عشان غرور قلبك رهيب
عشان فتور حبك عجيب
بسّ الغرام بينا كبير
قدّ الوجود واكبر كتير
رغم الأشاعه كان شديد
رغم الملامه كان عنيد
معرفش ليه عند البشر
أصبح مباح نقل الخبر
ده من الصباح حتى السهر
بسمع كلام يكوي الحجر
ليه بس كده يا ناس حرام
خلاص بقه لحظة سلام
هيفيد بأيه بينا الخصام
ولا الملام طبع الأنام
يا نور عيوني ربنا
هّو اللي بس عالم بنا
هوّ اللي أدرى بقلبنا
هوّ اللي هيصون حبنا

ع الشط
ع الشطّ قاعد يا عمري
والوجد قايد في صدري
ع الشطّ قاعد وفكري
كالموج بقلبي بيجري
لولا الأمل والأماني
وعشق قلبي وحناني
كان عمري ضاع وزماني
كان هجري طال وهواني
ع الشطّ قاعد حبيبي
والدمع حظّي ونصيبي
لا الموج بيطفي لهيبي
ولا بيخفي نحيبي
ع الشطّ قاعد يا غالي
وانت وزمانك ع بالي
أيام بعيشها وليالي
في عيون فؤادي وخيالي
ع الشطّ قاعد وسارح
والفكر في البحر سابح
ع الشطّ قاعد وجامح
في القلب وجدي وجارح
وصّل سلامي يا هوا
وصل حنيني للهوى
من يوم فراقنا الشوق كوى
قلبي اللي نفسه نعود سوى

عشان هواك
عشانْ بخافْ عليك أنا
من كلِّ حسادكْ هنا
هسكّنكْ في بيتْ جديدْ
عن العيونْ والناسْ بعيدْ
هسكّنك ع شطْ جميلْ
بين الجناينْ والنخيلْ
منشوفشِ غيرْ بسَّ الطيورْ
فوقِ الروابي والصخورْ
خلاصْ بقى خلاص كده
أصبحْ محال الوضعِ ده
كل يومْ اشاعهْ أو كلامْ
كل يومْ وشايهْ أو ملام
هناكْ بعيدْ عن البشرْ
تحت النجومْ تحت القمرْ
هنعيشْ سوى ويّا الهوى
ويّا النسايمْ والهوا
هنعيشْ هناكْ قصةْ غرامْ
في دنيا تانيهْ يا سلامْ
دنيةْ حنانْ دنيةْ هيامْ
دنيةْ محبهْ وانْسجامْ
هنعيشْ معِ الموجْ والرياحْ
وِنفرِش الرملهْ وِشاحْ
هنقومْ وِنمشي ع التلالْ
والسهرهْ هتكونْ ع الرمالْ

يا عم
يا عمْ يا ساكنْ خيالي
يا اللي انتّ دايمًا عَ بالي
ليه بسِّ قلبكْ يا غالي
بالهجرِ والصدْ يُغالي
يا عمْ ترفَّقْ بحالي
وارحمْ سهادِ الليالي
خليكْ حِنيّنْ مُبالي
بوجدِ قلبي وْسؤالي
يا عمْ بِمنعكْ وِصالي
خيبتِ ظنّي وْآَمالي
حتى بْغِيابكْ نِضالي
معادشِ قدَّ احْتمالي
يا عمْ يا هاوي التَّسالي
ليه بسِّ غاوي انْفِعالي
هتبصِّ لي ازاي مِ الأَعالي
ولّا تحسْ بانْشِغالي؟

لو كنت
لو كنتِ في الدنيا الفضا
شمسِ وقمرْ وِنْجومْ سما
لو كنتِ أجملْ مِ الجمالْ
والحسنِ اكترْ مِ الخيالْ

اللازمه
مسمحشِ لكْ تتكبّري
مسمحشِ لكْ تتأمّري
بالحبِّ وحدو تقْدري
بالحبِّ وحدو فكّري
لو كنتِ سلطانةْ زمانْ
وِكانْ في إيدكْ صولجانْ
لو كنتِ حتى من الأَزلْ
حتى الأَبد لحن الغزل
اللازمة
لو كنتِ مصدرْ للحياهْ
زيِّ الهوا وْزيِّ المياهْ
لو كنتِ إلهامْ للقلوبْ
وكنتِ قنديلْ عَ الدروبْ
اللازمه
لو كانْ صُمودي مستحيلْ
عشانْ فُراقنا كانْ طويلْ
لو دابْ فؤادي مْنِ الْحنينْ
وِطالْ سهادي مْن الْأنينْ
اللازمه
الجمال نسبي
يا حبيبي مِ البدايهْ
بانْ عليَّه نورْ جمالكْ
بسِّ ما أثّرشِ فيَّه
في النهايهْ غيرْ خصالكْ
دي العيونْ أقمارْ كحيلهْ
والخدودْ أزهارْ جميلهْ
بسِّ والله الحسنِ نسبي
جوّه فكري وْعندِ قلبي
يا حبيبي لسَّه أحلى
من جمالكْ ظرفِ قلبكْ
يا حبيبي لسَّه أغلى
من دلالكْ صدقِ حُبَّكْ
لوْ جمالكْ يا حبيبي
كانْ حقيقي شيءْ خيالي
مشْ هيقدرْ يا نصيبي
يغلبِ الدهرْ والليالي
بالْمودهْ والمُسامْحهْ
راحْ تعيشْ قصةْ هوانا
بالْمَحبَّهْ والمُصالْحهْ
راحْ تدومْ بسمةْ هنانا

معقول
معقول خلاص قلبك نوى
من غير مصالحه ع النوى
ازّاي بقى بعد الهوى
مطاب لنا وحنا سوى
معقول خلاص نويت تغيب
وتروح بلاد عنها غريب
ازّاي هعيش من غير حبيب
وانت الدوى وانت الطبيب
ازاي هعيش وازاي هكون
من غير مشوف أجمل عيون
والله البعاد عنك جنون
وارحم كتير منو المنون
معقول نسيت عهد الغرام
ونسيت كمان عهد الهيام
ليه بسّ زاد بينا الخصام
بعد المودّه والوئام
معقول تفوتني للهوان
من بعد ما اديتك حنان
معقول تسيبني للزمان
من بعد ما اديتك أمان
معقول أصون أيام هواك
وتخون هوايا بطول جفاك
معقول يكون حبك هلاك
ونا اللي ظنيتك ملاك

هو الغرام
من يوم لقاك ونا قلبي في حيره
عشان هواك ده غريب السيره
أيام بحس بسعاده كبيره
وايام بحس بمراره وغيره
هو الغرام ده نعيم يا ربي
ولا الغرام ده عذاب لقلبي
يا اهل الهوى اداري وخبي
ولا اشتكي هواني وغلبي
غريب بحبك عجيب في طبعك
مبسوط بوضعي معاك ووضعك
إن جيت ازورك حرقني شمعك
وان قلت اسيبك غلبني دمعك
يا ريت تشوف لي وياك طريقه
عشان تقوللي ايه الحقيقه
دي الحيره هايجه فيّه وعميقه
والغيره عاصفه والروح غريقه

جايز
صفات كتيره بتعجبني فيك
حاجات جميله بتسحرني بيك
بسّ الحقيقه فيك شيء معيّن
ايه بسّ هو مش قادر ابيّن
جايز بحبك لأن قلبك
أمين وصادق سنين بحبك
جايز بحبك عشان وصالك
عشان دلالك ونور جمالك
جايز بحبك عشان كرامتك
عشان غلاوتك عشان شهامتك
جايز بحبك عشان رزانتك
عشان حلاوتك عشان أمانتك
جايز بحبك عشان عيونك
عشان جنونك عشان فنونك
جايز بحبك عشان وفاءك
عشان صفاءك عشان إباءك
جايز بحبك عشان حياتي
هاديه وسعيده معاك يوماتي
وبرضه جايز وده اعتقادي
كل الصفات دي وده اعتيادي

ثلج ومطر
ثلج ومطر من غير قمر
والليل نشر ع الكون ضجر
والشوق عذاب من غير أنيس
حتى الكتاب مش ده الجليس
من غير لقاك من غير هواك
والله الحياه غربه وهلاك
هو السمك خارج المياه
يقدر يعيش أو له حياه
بره الظلام جوه السكون
والقلب غارق في الشجون
حتى المنام جفا العيون
م الفكر والشوق والظنون
سهران وحيد من غير حنان
حيران شريد من غير أمان
وسط الجراح وسط الحريق
صوت الرياح وحده الصديق
نفسي أنام بس الأنين
شق السكون م الشوق سنين
وازاي هنام والليل رهيب
من غير حبيب منّي قريب

قصة حبي
يا حبيبي قصة حبي
عايشه على طول بقلبي
كلها أنغام ورديه
كلها أحلام فضيه
إنمّا محتاجه لدنيا
أكبرمن كده بشويّه
يا حبيبي حبك جارف
وهيامك دايما عاصف
وسعادتي بيك وبيّه
يا حبيبي ميّه الميّه
انما محتاجه لدنيا
أكبر من كده بشويه
يا حبيبي حبك غنوه
ألحانها جميله وحلوه
وكلامها الصادق ليّه
مكتوب بحروف ذهبيّه
انما محتاجه لدنيا
أكبر من كده بشويّه
يا حبيبي حبك جنّه
وحدايق ورد وحنّه
وروايح رايحه وجايّه
ونسايم هاله عليّه
إنّما محتاجه لدنيا
أكبر من كده بشويّه
يا حبيبي حبك نعمه
يا حبيبي حبك قسمه
ده انت يا حبيبي هديّه
م السما جاتني يا عنيّه
إنّما محتاجه لدنيا
أكبر من كده بشويّه

غرام كلام
يا حبيبي من غير هواك
أو لقاك الدنيا هلاك
بسّ برضه رغم جفاك
لسّه قلبي وروحي معاك
إنمّا ليه حلفت زمان
راح تكون حياتنا أمان
وعشان إيه قلت كمان
مش هيفصل بينا مكان
يعني إيه مكانش غرام
ولا ده كان يا دوب كلام
يعني إيه مكانش هيام
ولا ده كدب وبان قوام
ليه كده أصبحت غريب
عن عينيّه يا أغلى حبيب
ليه بقى معادش نصيب
يا حبيبي والله عجيب
يا حبيبي هواك عسل
كان معايا وراح مثل
ليه بقى للهجر وصل
هو إيه كان يعني حصل

صارح
يا عمّ صارح بحبك
واشرح طبيعة خواطرك
يا عمّ حاول بقلبك
تعرف حقيقة مشاعرك
ليه بسّ خايف تصارح
باللي انت كاتمه يا عمري
ليه بسّ خايف تفاتح
هوّ الزمن لسّه بدري
يا عمّ صمتك ده أثّر
على وجودي وحياتي
يا عمّ بالعقل فكّر
وارحم سهادي وآهاتي
لو كنت مغرم وعاشق
مكانش قلبك سلاني
لو كنت مرهف وصادق
مكانش حبك ضناني
يا نور عيوني الليالي
كالموج بتجري وتجري
وانت وغرامك يا غالي
عايشين بقلبي وفكري

حبيت هواك
حبيت هواك من غير كسوف
من غير هواجس أو ظنون
حبيت وكان قلبي الشغوف
بالعشق أقرب للجنون
حبيت هواك والحبّ حق
لكل انسان في الوجود
شرطي الوحيد إخلاص وصدق
من غير نهايه أو حدود
في كل ثانيه يا جميل
قلبي معاك روحي معاك
وفي كل ناحيه مستحيل
أقدر أعيش الاّ بهواك
ويّاك أنا بنسى الزمان
بنسى العذاب بنسى الألم
ويّاك هنا عمري بأمان
من غير ضنا أو يوم ندم
الله عليك يا أحلى حب
يا اللي بهواك قلبي اهتدى
الله عليك يا أوفى قلب
يا اللي بلقاك عمري ابتدا

مغرور
سنين ونا عشقان هواك
عشقان جمالك وبهاك
بسّ الغرور خلاك أسير
للشكّ بالحبّ الكبير
والله حرام ويّا الجراح
أسهر وبات حتى الصباح
والله حرام في الليل أكون
رهن الهواجس والشجون
والله حرام من غير نصير
أمشي واسير دربي العسير
من غير أمل ليه برضاك
من غير نصيب إلاّ بجفاك
يا نور عيوني ليه كده
هوّ الغرور بالشكل ده
ده القلب داب والهجر طال
حتى الوصال أصبح محال
يرضيك عذاب قلبي الحزين
يرضيك ضياع حبّ السنين
والله عجيب ذنبي الوحيد
ويّا الحبيب حبّي الشديد
إزّاي هقابلك يوم ونول
وصلك وجمبك ميت عذول
وازاي هبادلك يوم هواك
والقلب محروم من لقاك

خلاص
يا اللي قتلت فيّه الغرام
بالهجر والصد والخصام
يا اللي زرعت فيّه الجراح
بالغدر والسهد للصباح
خلا ص بقى مليت جفاك
مليت غرامك وهواك
خلاص بقى حرّم وتاب
قلبي اللي من أشواقه داب
أحلى زمان عشناه سوى
بالحبّ والشوق والهوى
بسّ الغرور خلاك كده
قاسي وعنيد بالشكل ده
زعلان قوي وغاوي الغضب
تقلان قوي ومن غير سبب
عملت ايه حتى الضنا
والحزن حظي كام سنه

ليلة مبارح
ليلة مبارح ع سطح البيت
والناس سهرانه ومرتاحه
كان بينا كلام بسّ يا ريت
قلناه يا حبيبي بالراحه
همس العذال وملامهم
غمز الحساد وكلامهم
خلّونا لا قادرين نتكلّم
ولا بعنينا حتى نسلّم
مالكو انتو يا ناس بس ومالنا
ليه بقى شاغلين بالكو وبالنا
أيام وسنين وحنا في حالنا
لا روحنا لحد ولا حد جالنا
هتحسوا بإيه يا ناس بكره
لو شافكو عذول وغار منكو
هتحسوا بإيه ده لو مرّه
سمعكو حسود وقال عنكو
يا ريت يا عاذل تتعلّم
يا ريت يا حاسد تتندم
عشان لو كنا بنتألم
مش رايحين أبداً نستسلم

بحبك
بحبكْ حبيبي بحبكْ لأنكْ
مالكني بحُبكْ فاتني بِحسنكْ,
بحبْ فيك صفاءكْ بحبْ فيكْ وفاءكْ
بحبْ فيكْ إباءكْ وِنارْ كبرياءكْ.
بحبْ فيكْ حنانكْ وِطيبةْ فُؤادكْ
وِبشكرْ زمانكْ ع بهجةْ وِدادكْ
بحبْ فيكْ دلالكْ وِروعةْ غرامَكْ
وِبعشقْ وِصالكْ وِلوعةْ هيامكْ.
بحبكْ وِلُطفكْ أسرْني يا غالي,
بحبكْ وِظرفكْ سحرْني ليالي,
بحبكْ وِحبك قدرْ وانْقسمْ لي,
قدرْ يا حبيبي رِجِعْ وابْتسمْ لي.
بحبكْ وِمنكْ خيالي وِفكري
وِعنكْ كلامي وِنثري وِشعري,
بحبكْ وِروحي فِداك يا حياتي,
يا بلسمْ جُروحي وِدمعي وْآهاتي.

والله حرام
والله حرام بعد الغرام
بعد الموده والوئام
تمشي وتعديّ كالمنام
من غير ما حتى تقول سلام
معقوله متحسّ بندم
معقوله متحسّ بألم
والله الحياه بعدك عدم
والدنيا من دونك سأم
والله حرام تفضل بعيد
من غير سبب وافضل شريد
والله حرام تفضل عنيد
والهجر نار والشوق شديد
ليه يا حبيبي ان جيت اليك
فوق للفضا بصّت عينيك
وان يوم كمان عدّيت عليك
بلقى العواذل بين إيديك
إرحم بقى قلبي انكوى
من نار حنيني والجوى
إرجع بقى قبل الهوى
ميطير بقلبي في الهوا

هشكيك لمين
يا اللي هجرتْ منْ غيرْ سببْ
من غير ملامْ منْ غيرْ عتبْ
هشكيك لمينْ غيرْ للْكريم
هوَّ الرحيمْ هوَّ العليم
طولْ مانتَ متْناسي الغرامْ
والحبِّ والشوقْ والهيامْ
مشْ راحْ يأثّرْ فيكْ عِتابْ
مهما الغيابْ طال والعذابْ
عندكْ خلاصْ معادشِ فرقْ
بينْ حبْ وِغدرْ بينْ كدبْ وصدقْ
حتى الحنانْ بِتاع زمانْ
أصبحْ خداعْ غشِّ وْهَوانْ
صابرْ أنا رغمِ الحنينْ
رغمِ الضنا رغمِ الأنينْ
حتى الدُموعْ سالتْ لِفوقْ
منْ كُترِ ما في القلبِ شوقْ
يرْضيكْ أصونْ عهد الهوى
وِتْخون فؤادي الْلي انْكَوى
يرْضيكْ أكونْ عنّكْ غريبْ
منْ بعدِ ما كنتِ الحبيبْ

لمّا الغرام
لمّا الغرام عندك كلام
يا دوب تسالي والسلام
لأ مستحيل أعشق وميل
مهما كلامك كان جميل
مقدرش احب يا عم كده
مقدرش اميل بالشكل ده
أصل الفؤاد زي الشجر
محتاج وداد قدّ المطر
يا عم انا مش أيّ حد
تقدر عليه دون أي جهد
عندي الغرام مبدأ وجدود
مبدأ حياه من غير حدود
يا عم انا نفسي بجد
أعشق وحب لأقصى حد
نفسي بغرام ملوش مثيل
نفسي بهيام ملوش بديل
يا عم ليه حبك عذاب
ده العمر ولّى والشباب
يا عم ايه خلّى الهوى
عندك أماني في الهوا
يا عم أنا محتاج لمين
بالحبّ صادق وأمين
محتاج لمين حبه المتين
هيعيش مدى عمر السنين

وحياة غرامك
وحياة غرامك يا عنيّه
لا لون ولا طعم للدنيا
إلاّ بهواك ووصالك
ونور بهاك وجمالك
ده انت القمر في الليالي
وسط النجوم في الأعالي
وانت النسيم في العصريه
وانت النديم للصبحيه
وحياة عيونك الهاديه
وورود خدودك الناديه
هصون غرامك وحبك
وكون بقربك وجمبك
وحياة جمالك عيوني
عشقاك ورايداك جنوني
يا ربي إحميه وصونه
من كلّ حسّاد عيونه
وحياة غلاوتك زماني
من يوم محبّك سباني
نوّر وفتح بوجودك
زي الورود على خدودك
وحياة حلاوتك يا قلبي
هسقيك تمللي كاس حبي
هسقيك بإيدي السعاده
وكلّ ثانيه بزياده

لو حقيقي
يا حبيبي زاد عذابي
طول بعادك وغيابك
يا حبيبي ضاع شبابي
من عنادك وعتابك
لو حقيقي كنت عاشق
كان فؤادك حسّ بيّه
لو غرامك جد وصادق
كان ودادك بسّ ليّه
يا حبيبي امسح دموعي
والعذاب اللي في ضلوعي
يا حبيبي ارحم خضوعي
والهوان اللي في خنوعي
ليه المكابره والملاوعه
بعد متمنّيت هوايا
ليه المخاصمه والممانعه
بعد مترجّيت رضايا
يا حبيبي النوم جفاني
والسهاد سهّر عينيه
يا حبيبي الشوق كواني
والبعاد طوّل عليه
ليه بتتقل ليه بتبخل
بابتسامه أو بنظره
ليه بتغضب ليه بتزعل
هو انا قصّرت مره

التلفون
كلْ ميْرنْ هالتلفونْ
بقلبْ وشي بْكذا لونْ
وان طلّعتو مْنِ الصالونْ
بتحدّقْ فيِّه العُيون
بخْدو بْعيدْ عشانْ شايفْ
نظراتِ العالمْ صوْبي
بحكي بْهمسْ عشانْ خايفْ
هالعالمْ تسمعْ قلبي
يا روحْ قلبي ليلْ وِنهارْ
بستنى الرنِّه ع نار
بسألْ عنكْ أهلِ الدارْ
واهلِ الحارهْ لْعاشر جارْ
وحياتكْ معْ كلْ رنِّه
بفرحْ بَرقصْ وِبْغني
حتى الناسْ لِقرابْ منّي
عمْ بِتحاكوا كتيرْ عنّي
لو تِبعتْ لي رساله
في الساعهْ راحْ أتألّمْ
والحالِه تبقى حالِه
فيها الإشيا تتأزِّمْ
لو مرَّهْ ما تْحاكينا

من عمري ضاعْ كلِّ اليومْ
لو مرّهْ ما تناجينا
من جفني راحْ طعمِ النومْ

ألوان
أخضر لقاك أحمر هواك
أسود جفاك أبيض صفاك
في كلّ حال شكل ومجال
ألوان هواك عدّوا الخيال
عند اللقا عند الوصال
ألوان هواك آخر جمال
حتى الزعل أكبر زعل
بروح قوام عند الغزل
القدّ بان عوده نما
والعين كمان بحر وسما
والخدّ أبيض ياسمين
والشعر أسود ع الجبين
الوشّ بدر والعطر ورد
والشفه زهر والبسمه شهد
السنّه لولي والكلام
سكر نبات على الدوام

كل مرّه
كل مره بتلمح في عيوني
نظرات الحبّ الجنوني
بظلك ماشي ومش خايف
وبتعمل نفسك مش شايف
بظلك ماشي ومتجاهل
فكرك هالنسيان بالساهل
بظلك ماشي ومش سائل
أو حتى شلونك مش قايل
شو السيره يا قلبي الحاير
في الدنيه شو هاللي صاير
وين الحب راح والإخلاص
ليش الود ضاع والإحساس
يا روح قلبي مش هتلاقي
زيّي في حبي واشتياقي
مش هتلاقي زيّي عاشق
مش هتلاقي زيّي صادق
كيف ممكن تسمع أنيني
من غير متحسّ بحنيني
كيف ممكن ترضى بلهيبي
من غير ميهزك نحيبي
لو ماشي ومش راجع تاني
والهجران نسّاك زماني
راح تفضل حبّي وغرامي
راح تفضل عشقي وهيامي

معرفش ليه
معرفش ليه صار مستحيل
الوصل بينا يا جميل
حتى الكلام ولا السلام
أصبح محال بينا وحرام
إيه غيّرك بالشكل ده
إيه حيّرك منتاش كده
هو الغرام عطف وحنان
ولا الغرام هجر وهوان
أجمل زمان عشناه سوى
بالحبّ والشوق والهوى
بسّ الهوى راح واختفى
لمّا انتهى عهد الوفا
ليه بس تصدّق قول عذول
أو حدّ حاسد حبنا
هيّه الشرائع والإصول
بتقول نخالف قلبنا
إشمعنى بس قلبي الأمين
فضل وفي رغم السنين
واشمعنى بس حبي الكبير
فضل كمان حبّ بضمير

بعد الفراق
لمّا الفراق يا عمري طال
عهد الغرام والحب زال
أمّا الوفاق لمّا ابتدا
قلبي إلى السعد اهتدى
كل الزعل بينا مضى
بعد القبل راح وانقضى
حتى الألم حتى الجفا
بعد الندم راح واختفى
من غير كلام سامحتني
من غير ملام صالحتني
حتى حنان قلبي الكبير
رجع وكان اكبر كتير
ورجعت لك ورجعت لي
وحلفت لك وحلفت لي
مهما العذول قال عننا
مش راح ينول شيء مننا

يا عمّ ليه
يا عمّ ليه قلبك كده
مغرور وسايق في الدلال
هو الغرام بالشكل ده
ولاّ الغرام قرب ووصال
يا عمّ قلبك في الغرام
قصده التسالي والكلام
مرّه القريب منك غريب
مرّه البعيد عنك قريب
لو كنت صادق بالهوى
كان من زمان قلبي في أمان
لو كنت عاشق كان سوى
عشنا في غرام حب وحنان
يا عمّ لو حبك هلاك
عمري وحياة قلبي فداك
يا عمّ انا مغرم هواك
مغرم جمالك وبهاك

متقولش
متقولش عن إنسان حبيب
حتى الحبيب يصبح نصيب
ياما القريب أصبح غريب
ياما الغريب أصبح قريب
يا عمّ مين يقدر يقول
في الحظّ إيه هيّه الأصول
برضه الغرام حظّ ونصيب
يمكن يصيب يمكن يخيب
رغم الوعود في الحب صدود
رغم العهود في الحب جحود
بسّ العجيب جوّه الفؤاد
وصل الحبيب هو المراد
مهما غدر مهما زعل
مهما هجر مهما تقل
ظلم الحبيب قيل في المثل
ع القلب أحلى م العسل
عشان كده بهمسة عتاب
كل الألم كل العذاب
هيزول وهيعود الشباب
للقلب من بعد الغياب

لا تفكريني
لا تفكريني مليونير
ونا الحقيقه مديونير
والله الحقيقه الصريحه
هيّه الطريقه المريحه
متغركيش الفتاكه
ولا الهدوم والشياكه
لا عندي ياخت وطياره
ولا يا حسره سياره
بخاف عليكي يا عيوني
من نار هوايا الجنوني
بخاف وبشتاق اليكي
رغم الشقاوه في عنيكي
بهاكي والله سحرني
ونور جمالك أسرني
بسّ الحكايه يا عمري
قلبي انجرح وضاق صدري
حبّيت كتير تفاض بيّه
ظلم الحبايب يا عنيّه
عشق العيون ضيّع قلبي
ضيّع حياتي ومش ذ نبي
نفسي أعيش بقى خالي
مرتاح بفكري وخيالي
من غير حبيب يحيّرني
وفي كلّ ليله يسهرني

عندي سؤال
يا ناس يا هو عندي استفسار
يا ريت هنا حد يشرح لي
عشان خلاص بقيت محتار
من كلّ حاجه بتحصل لي
ليه ان ضحك وحياني
وقال كلام له معاني
تاه الكلام على لساني
ونسيت زماني ومكاني
يا الله يا هانم يا الله يا بيه
يا الله قولولي كل ده ليه
وانت هنا قول متخافش
وانت كمان مبتعرفش
ليه ان لمس بالإيد شعري
حسّيت بنار ماشيه في صدري
وان يوم همس وشم عطري
حبّيت اروح قوام وجري
ليه ان خطر زيّ النسمه
وقاللي بعنيه كام كلمه
ردّيت بنظره وبسمه
والقلب خايف م اللمه
أما بقى لو عدّى العصر
من غير مهل عليّه البدر
حسّيت بشوق كبير كالبحر
وخوف شديد عليه م الشر

لا تغالي
يا حبيباً ساكناً قلبي وخيالي
إن تشأ صدي وهجري لا تغالي
كم طلبت اللطف والرفق بحالي
بينما تقسو وحتى لا تبالي
كم دعوت الأمس قلبي للقاء
راجياً بدر الدجى طول البقاء
أمن المعقول أن تهوى شقائي
دون عذر غير قهري وابتلائي
يا حبيبي ان ترى خيراً بهجري
أطفىء النار التي ثارت في صدري
يا حبيبي إن سبرت اليوم صبري
لست أدري إن سيبقى حتى فجري
يا حبيبي إن تكابر قد تعاني
إنني أدرى بكم تهوى حناني
كلّ صدٍ وضياعٍ وهوان
لن يعيد العمر للماضي ثواني
يا حبيبي في الهوى ما لي اراده
قد سلبت القلب أسباب السياده
يا حبيبي صار هذا البعد عاده
بعد أن كانت لنا كلّ السعاده

ع الظاهر
يا حبيبي الناس محتاره
بطبيعة قلبي وقلبك
إنمّا إيه دخل الحاره
بحقيقة حبي وحبك
يا حبيبي دول لايمينا
وحاسدينا ليل ويا نهار
يا حبيبي دول ظالمينا
وحنا جيران والجار للجار
يا حبيبي الناس بتحكم
أحياناً على الظاهر
واحياناَ برضه بتفهم
أشياء لا ع البال والخاطر
ليه كده بس شاغلين بالكو
في غرامنا وسيرته أعوام
ليه كده بس شاغلين حالكو
في حاجات كلّها أوهام
فين زمانك راح يا جيره
فين زمانك راح يا طيبه
غيرش نار الشك والغيره
لسّه قايده ونار الغيبه

إنسان بسيط
يا عم أنا انسان بسيط
ميغرنيش دهب ومال
لكن بجد إنسان نشيط
بكسب وباكل بالحلال
عشان كده نفسي أعيش
مع حدّ زيي في الطباع
كلام كتير عندي مفيش
عايزين نعيش بالإقتناع
يا عم أنا نفسي بحبيب
قلبه العطوف مليان حنان
مقدرش احب انسان غريب
عني بطبيعته مهما كان
يا عم أنا مرضاش غرام
مرهون بمال دهب وماس
أصل الغرام ود وانسجام
وبالأساس من غير مساس

دلوقتي بس
دلوقتي بس بعد الفؤد
معتاد عليك خنت الوداد
دلوقتي بس بعد الهيام
مزداد إليك بعت الغرام
طب قلت ليه وياك هنا
هلقى السعاده والهنا
وحلفت ليه هنعيش سوى
من غير ملاوعه أو نوى
دلوقتي بس حسّيت بضيق
زيّ الغريق جوّه الحريق
دلوقتي بس خلّى الغرور
قلبك ملان كبر ونفور
دلوقتي بس ناوي الهرب
غاوي الغضب من غير سبب
دلوقتي بس نفسك تكون
حر وطليق حتى بجنون
خلاص نسيت أيام زمان
أيام صفا حبّ وحنان
خلاص بقيت إنسان غريب
ونا اللي كنت منك قريب

حسّك عينك
حسّك عينك يوم تتنازل
عن وعودك أو تتجاهل
حسّك عينك يوم تتخلّى
عن عهودك أو تتسلّى
حسّك عينك يوم تنساني
أو تخدعني أو تسلاني
حسّك عينك تنسى تجيني
قبل النار م الشوق تكويني
حسّك عينك وحياة عينك
يدخل عاذل بيني وبينك
حسّك عينك يوم نتفارق
أو نتباعد أو نتخانق
حسّك عينك تشغل بالي
ولا تغيّر قلبي وحالي
حسّك عينك يشمت فيه
أيٍّ كان في الدنيا ديه
حسّك عينك قلبك يزعل
أو يتجنى مره ويتقل
ده انت القلب اللي بيهديني
وانت الحب اللي بيحييني

هواك
هواك نصيبي في دنيتي
ملك فؤادي ومهجتي
هواك نعيمي وجنتي
سبب وجودي وبهجتي
شكرا حبيب قلبي الجميل
شكرا وشكري لك جزيل
مهما انحكى ومهما قيل
شكري وثنائي لك قليل
هواك سلام أمن وأمان
من المخاوف والهوان
هواك كمان هو الضمان
من الليالي والزمان
يا نور عيوني في الجمال
حبك وحسنك صار مثال
حتى هواك أصبح مجال
للفكر والفن والخيال
يا نور عيوني للفؤاد
حبك وطن حبك بلاد
هو المنى هو المراد
هو الهنا هو الوداد

الحظ
يا حظّ قوللي إنت ايه
صنع الخيال أو شيء أكيد
أياً تكون يا حظّ ليه
دايماً معايا بس عنيد
يا حظّ مين فتحت له
قلبك بفرحه عاش سعيد
ومين يا حظ قفلت له
قلبك بجرحه بات وحيد
يا حظّ لمّا تكون جميل
إزّاي بتختار بعضنا
وليه بقى دايما بخيل
مع الغلابه زيينا
يا حظّ بص هو الفقير
ملوهش قلب عشان يحب
ولا الكبير عشان كبير
هوّ اللي وحده عنده قلب
يا حظّ حس حتى التعيس
من حقه يفرح له بيوم
خلّيك حنيّن وونيس
عشان يجيلها في ليله نوم

أفكار وامواج
يا نور عيوني في صدري
أفكار كتيره بتسري
وامواج كبيره بتجري
بسنين حياتي وعمري
أرجوك أعني وساعدني
ولا انت غاوي تعاندي
أرجوك تعال وواعدني
ولا انت ناوي تكايدني
أفكار بتسرح يا غالي
لأيام سعيده بأمالي
وامواج بتسبح ليالي
لبلاد بعيده في خيالي
أفكار بتوصف غرامي
وليل سهادي وألامي
وامواج بتبعت سلامي
وعشق قلبي وهيامي
أفكار وأمواج حبيبي
بتقيد حنيني ولهيبي
لو بسّ ترجع نصيبي
لو بس تسمع نحيبي

طاير
جسمك هنا وقلبك بعيد
طاير مع الأحلام سعيد
جسمك هنا وفكرك شريد
حاير وحبي لك أكيد
معرفش ليه أصبح بخيل
بالوصل قلبك يا جميل
ده الليل تقيل قاسي وطويل
والويل شديد والنوم قليل
بسّ اعمل ايه أنا بهواك
ونا اشكي ليه والروح فداك
والله الحياه بعدك هلاك
ملهاش وجود إلاّ بلقاك
عمّال تدوّر عن حبيب
عنك بعيد عنك غريب
عمّال تفتش عن نصيب
وتفوت حبيب منك قريب

معرفش
معرفش ليه قلبك صبح
عنيد كده من غير سبب
معرفش إيه خلاّه جرح
قلبي اللي أجمل حب وهب
صدقت ليه كدب العذول
من غير متسمع كلمتي
هيّه الأصول يا بن الأصول
بتقول تدمّر دنيتي
قلبك وفي ودايماً جميل
بس للأسف بيّه غدر
صبرك كمان دايماً طويل
إلاّ معايا يا قمر
مغرور قوي مغرور بحق
عشان بجد ملكش زي
حتى القمر م الغيره انشق
عشان معادش عنده ضي

النهارده
بسّ النهارده بعد ما
بقيت لوحدي سنين شريد
بسّ النهارده عندما
بنيت حياتي من جديد
بسّ النهارده جاي تقول
مشاق لحب أيام زمان
سكت ليه لمّا العذول
خلاّك تروح وتغيب كمان
لمّا بكيت لك ما التقيت
منك ولا كلمة حنان
لمّا شكيت لك ما انتهيت
حتى رميتني للهوان
بصّ الغرام زيّ الزهور
محتاج لمين يتعب عليه
من غير رعايه أو شعور
ازاي يعيش ونحسّ بيه
رغم الحنين والشوق أنا
مقدرش لك تاني أكون
بعد العذاب بعد الضنا
مسمحش لك تاني تخون

يا حبيبي
يا حبيبي طال عذابي
طال سهادي من فتورك
يا حبيبي ضاع شبابي
ضاع فؤادي من نفورك
يا حبيبي العمر بيجري
وانت فاكره لسه بدري
دي السنين قبل الدقايق
راح تعدّي وانت رايق
يا حبيبي زاد حنيني
زاد أنيني من جحودك
يا حبيبي شوف جنوني
شوف ظنوني من صدودك
يا حبيبي الحبّ نظره
لو ده كان فعلاً حقيقي
والغرام برضه لمرّه
راح يعدّي في طريقي

أين
يا حبيبي الأصدقاءُ
أينَ كانوا ثم فلّوا,
يا حبيبي الأقرباءُ
أين كانوا ثم ولّوا,
قد تخلّى القومُ عنكَ
بعد كبوٍ وانتكاسِ
قد تناسوا كيفَ منكَ
قد تدانوْا بالتماسِ,
ما تبقى كيْ يرُدَّ
الشرَّ عنكَ غيرُ حُبّي
ما تصدّى أوْ تحدّى
النيلَ منكَ غيرُ قلبي.
يا حبيبي في الحياةِ
نكاساتٌ تتعدَّدْ
والحياةُ للمماتِ
بالصراع ِ تتجدَّدْ
فادنُ مني يا حبيبي
لا تخفْ أوْ تتردَّدْ
كل شوقٍ أو لهيبٍ
بالوصالِ يتبدَّدْ.

يا عمّنا
يا عمّنا لقصتي
محتاج لحل قوام قوام
عشان خلاص دي فرصتي
هتضيع وده والله حرام
يا عمّنا قلبي عشق
إنسان غريب عن حيينا
ومع إني ويّاه بنتفق
عايزيني احب حد زيينا
يا عمّنا ده من زمان
والعرف والعاده هنا
بسّ القريب وابن المكان
هو اللي يتقدّم لنا
يا عّمنا إيه ذنبنا
لمّا القلوب تهوى وتميل
يا عمنا غير قلبنا
ملناش موجّه أو دليل
يا عمّنا ليه بس نكون
للعرف والعاده عبيد
وليه نكون من غيرعيون
تعشق كما تهوى وتريد

يا حب عجيب
يا حب عجيب أمر الحبيب
دايما بعيد عني وغريب
بشتاق إليه وخاف عليه
بسّ بهواه ملناش نصيب
يا حبّ لك على الأمير
قبل الفقير سلطان كبير
ياما سحرت ياما أسرت
اشمعنى بس قلبي الأسير
يرضيك أعيش في الكون وحيد
من غير حبيب لو من بعيد
يرضيك أسير دربي العسير
حيران حزين سرحان شريد
وازاي هبات من غير جليس
وازاي هنام من غير أنيس
ده الليل شجون يأس وظنون
طول ما الفؤاد جوّاه حبيس

انتظار
يا حبيبي بانتظارك
داب فؤادي وضاع شبابي
حتى إنك باعتذارك
مش هتطفي نار عذابي
جود بوصلك حتى تصفو
من جديد أيام حياتي
جود بحبك حتى أعفو
وانسى أحزاني وآهاتي
يا حبيبي مش هتمسح
بالكلام وحده دموعي
مش هتشفي بل هتجرح
بالبعاد قلبي وضلوعي
يا حبيبي ازاي هداري
عن عيون الناس غرامي
ده المكان نور بناري
والزمان حسّ بألآمي
يا حبيبي ارحم حنيني
واشتياق قلبي لعيونك
ده الوجود كله بأنيني
ضج طول محيا بدونك

إعتراف
يا حبيبي لا تلومني بل أعني
إن كشفت السر قهرا غصب عني
لا تسلني أي شيء لا تدعني
عرضة للنيل من حبّي ومني
يا حبيبي ليس في الأشواق عار
لا ولا في الحب عيبٌ أو شنار
يا حبيبي ليس للخوف اعتبار
في الهوى أصلاً ولا عنه اعتذار
يا حبيبي أنت مثلي في الغرام
قد حرمنا الوصل حساد الأنام
هل من المعقول نسيان الهيام
في جدال مستديمٍ أوملام
يا حبيبي بالوئام والوداد
لن يغيب الحب يوما عن فؤادي
إنّما بالبعد عني والعناد
سوف يحظى الحاسدون بالمراد
يا حبيبي أنت خلّي ونديمي
مثلما أنت جليسي في نعيمي
لا تدع رحماك ندّي أوغريمي
يحرم الأيام من خلٍ حميم

دون جوان
يا دون جوان اسمع بقى
مش كل طير لحمه طري
هجر وجوى غدر وشقا
مش ده الهوى في تصوري
يا عمّ بص ملّيت غزل
مليان خداع وزيف كتير
ملّيت كمان من غير زعل
إنسان لكبره صار أسير
يا عمّ شوف لك أيّ حد
يعشق عينيك بكلمتين
يا عمّ مين قال لك بجد
هنده عليك بغمزتين
يا عمّ لو شهد الكلام
مقدرش أعشق أو أميل
ده الحبّ عندي والغرام
مش بالكلام لو كان جميل

في ناس
في ناس كتيره للأسف
حاسده البشر من غير سبب
حتى اللي بينا من شغف
صار يتحسد والله عجب
ياما انتشر عنّا وكبر
وازداد كلام من حولنا
بسّ الكلام مهما كتر
مش راح يفرّق شملنا
معرفش ليه عند البشر
نقل الخبر أصبح متاح
حتى ولو سبب ضرر
للبعض منّا أو جراح
يا نور عيوني انسى الملام
وانسى الزعل وانسى العذاب
طول ما الغرام هو الغرام
مالناش ملام ملناش عتاب
إصبر حبيبي ع الحسود
واقرأ عليه سورة الفلق
مهما عمل مش راح يسود
هوّ الحسود في يوم صدق

نار غرامك
يا حبيبي نار غرامك
في الحشا قايده وصدري
إنّما أنوار هيامك
في الفضا ضاويه وعمري
يا حبيبي من حنانك
ابتديت أعشق حياتي
وابتديت بسّ في زمانك
أستعيد حبّي لذاتي
يا حبيبي صرت أعشق
بعد حبّك كل وجودي
قبل حبّك لو تصدّق
كنت مداري بجمودي
بسّ لمّا النور هداني
للعيون الحلوه ديّه
عاد وجودي وعاد كياني
حلو من تاني بعينيه

كن قويا
يا حبيبي كُنْ قويًّا كنْ صَبورا
إنْ غدا سرُّ الهوى يومًا جهورا
لا تظنّ السرَّ قد يبقى دهورا
إن يدم شهرينِ أو حتى شهورا
أينما نمشي الهوينا أو نكونُ
حولَنا همسٌ وغمزٌ أو عُيونُ
هل تشي الأطيارُ؟ هل تحكي الغصونُ؟
أم تُرى الأزهارُ عن حقدٍ تخونُ
يا حبيبي لمْ تنل يوماً سلاما
من عذولٍ لم يذق أصلاً غراما
كيفَ تبغي اليومَ حُباًّ أو هياما
من عذولٍ يملأُ الكونَ ملاما
يا حبيبي كلُّ سرٍ سوفَ يُنقلْ
إن تعجلْ كشفُهُ أو إن تأجَّلْ
من سيدري قد يكونُ الكشفُ أفضلْ
فالتلاقي قد يكونُ الآنَ أسهلْ

يا مقيماً
يا مقيمًا في البصرِ كم أعاني في السفرِ
من حنينٍ مستعرِ كاللجينِ المنصهرِ
يا حبيبي كالوترِ أو كضوءٍ منكسرِ
صرتُ أبدو في السمرِ في البيادي والحضرِ
أينَ منّي يا قدري وصلُ شوقٍ للسحرِ
بين وردٍ أو شجرِ تحت نجمٍ أو قمرِ
ما تبقى للنظرِ في الليالي والسهرِ
غير ماضٍ مختصرِ في الهدايا والصورِ
ما لديا يا قمري من مرامٍ أو وطرِ
غيرُ لقياكَ العطرِ دون خوفٍ أو حذرِ
فاروِ قلبي كالمطرِ في القريب المنتظرِ
فالوصالُ للبشرِ كالمياهِ للشجرِ