كنوز نت - ساره ادهم

يا ترى في حل ..؟!


فضفضة :


أول شغلة بالنسبة لشركات الاتصالات الفلسطينية أو مصلحة المياه أو شركة الكهرباء ! ما بعرف هم دورهم عم يمصو بدمنا و الا ايش، حرمنة و نصب عينك عينك .

بصراحة أنا قررت أفصل التليفون الارضي رغم اني لاغية الدولي و الصفر و حتى ع ارضي ما برن إلا للضرورة، و كل شهر تقريبا بدفع 300 شيكل
و الشرائح سواء #أوريدو أو #جوال والله ما بدهم الا حرق . من ناحية اسعارهم النار . و الاسخم ملكية الشريحة بعد فترة من الزمن ازا ما استخدمتها بتصير من حق الشركة انو تبيعها كرقم جديد . طيب يا ربنا يا عيسى يا محمد ليييييييش هيك . كان معي رقم قديم و شطب . هلا كل العالم يلي بعرفوني لما يرنو بيطلعلهم حد تاني . بينما لو كان #اورانج او #سيلكوم خليها عشر سنوات مسكرة بتضلها ملك صاحبها . ايش هالقرف .!!!!
ما بعرف كيف صارت حياتنا !!

تفكيرنا تقيد ، بصدق وصلنا لمرحلة خطيرة انو نسينا قضيتنا الاساسية وصار همنا كيف رح ندبر للدفع ،
و بشكل عام نحنا الشعب الفلسطيني وضعو المادي مو فوق الريح ولا مليونير ، خاصة موظفين الحكومة !!

موضوع تاني ،"أزمة رام الله" ،


شوارعنا اللي كانت بكل أريحية تمشي فيها السيارات و البشر و الغجر ، هلأ صارت العجقة تصرعنا و كل يوم كارثة ،
حاراتنا الهادية يلي كانت بس لصوت العصافير و حفيف الشجر حسيت حالي قلبتها رومانسية هههه ،
بس جد صار ازعاجها متل الشوارع الرئيسية و أكتر . والادهى و اللي قاهرني تغيير هالطرق لاتجاه واحد و ما شاء الله نحن دايما عكس السير !! هاد سبب رئيسي للازمات الخانقة ،
يعني أنا ساكنة بالمدينة لو بدي اروح لدوار الاسود مشي ما بتاخد معي 5 دقايق ، بينما لوو بدي أطلع بسيارة بدي اقل شي نص ساعة ،
وألف مليون لفة زنخة لأوصل ،
و نجي ليوم السبت وعرب الداخل مع احترامي وحبي الهم . الا انهم خنقونا بسياراتهم والسرعة العالية .و الركن بالاماكن المخالفة يعني لخة وقايمة .
لا و يا حبيبي على المقاهي تطورت معهم وصارت الطاولات عالرصيف يعني قال متل دول برا 
ولكم خلي الرصيف للمشاة مهم بيمشوا بنص الشارع خلقة جيتوا انتو تكملوها وتحجزو نص الرصيف  . 

بكون الواحد شواربو فايتين بتمو وعم يأرجل وللي رايحة وللي جاية يع يع يع .

#رام_الله ما كان أهدى منها


ولا أحلا منها ، تع شوف هلأ كلو اسكانات مقززة متل صناديق الجاج . ويااااا ريت لما يبنوهم يخلو شوي من الشجر اللي هو كان معطي مدينتي الجمال . للاسف كلووو بيتقطع .
و الازفت من هيك انو الاجارات نااار، يعني بدك تشتغل أقل شي 3 شغلات لحتى تقدر تسكن ببيت محترم . و تسدد وتزفت وتنيل .
نجي لمستشفياتنا الحكومية اللي أقسم بالله حرااااام وهادي فتوى مني انهم ياخدو شيكل واحد سواء ممرض او دكتور !

أغلبهم خريج انعاش الاسرة

و ربي ميزان الحرارة ما بيعرفو يستخدموه
لااا و بكونوا عم يحكوا من روس مناخيرهم . على شوووو ما بعرف ، طبعا المريض ممكن يروح فيها بس وهو يستنى بجلالة الممرض/ة ليجي يطل عليه .

طيب يا الله،

المستشفيات الخاصة مو قدرة كتير ناس تدفعلها . متل الاستشاري
بدو الواحد ينام ليلة واحدة بدو يتك 1000 شيكل . عدا عن الفحوصات وووو ....الخ . الله يعافيني و يعافيكم .
جد يا جماعة البلد خربانة .
عندك واسطة و مخلص سادس ابتدائي توقع انك تصير وزير عااادي جدا بهالبلد .
مخلص جامعة بس بتنتمي للحزب الفلاني روح قشر بصل أحسنلك .

أسعار السيارات

سيارة عادية شركة بدك أقل شي أقل شي 70 ألف شيكل تكهم . بينما سيارات "نمرة صفرا" أزعم سيارة 30 ألف .
طيب نحنا أهل الضفة ممنوع نسوقها
بدنا ننحر حالنا لنقدر نجيب سيارة ضفة  لما أفكر بالرخصة تبعتي بفرط ضحك ، وبصير نفسي ابروزها او أتصور حدها .
و الموضوع يلي معزبني كتير هو :

تعزيب الكلاب أو القطط من الاولاد !!! و عادي ما في محاسبة لالهم .
و وضع السم بالطرقات لالها "البلدية المجيدة"  ،

يا ناس حرام والله حرام
عندي حكي كتير كتير كتير
بس لحتى ما يمل القارئ بكتفي بهاد
و بكمل بمنشورات تانية البقية .