• نصائح من امرأة متزوجة حديثًا :

1- أول شي : تزوجي لما تكوني جاهزة للزواج ، مش لما يجيكي عريس مناسب .

2- تصرفيش كل فلوسكم ع العرس و ع حكي فاضي ونسوان فاضية هيطلعوا يعلقوا على العرس وعليكي – حتى لو كانوا هدول النسوان بمناصب مهمة بمؤسساتهم – النسوان نسوان !!

3- تعزميش على عرسك غير الناس اللي (فعلا) بتحبك .. مش مضطرة تستضيفي ناس حاسدة وحاقدة لإنه "لازم" تعزميهم ..

4- مش مهم تكوني (بتعرفي) تطبخي ، المهم تكوني (بتحبي) تطبخي .

5- شهر العسل أحلى شي في الزواج ، تستغنيش عنه لإنه بعده بتبدأ كل المسؤوليات .

طبعا لو وفرتي مصاري العرس هتروحي أحلى مكان في العالم .

6- تصدقيش المسلسلات العربية إنه في (حماية) بتكره زوجة ابنها بلا سبب ، إنتِ المسؤولة عن أي انطباع بياخدوه (دار حماكي) عنك ؛ لإنك الدخيلة عليهم مش هما . وما فيكي تتخيلي قديش حلو شعور حب حماتك وبناتها إلك واشتياقهم لزيارتك وحديثهم عنك بالخير قدام الناس .

7- بيتك مملكتك وذوقك الخاص مش ذوق بنات عمك مثلا .

8- كل ما رتبتي بيتك بسرعة بكل تفاصيله وخزاناته ودروجه كل ما شعرتي بالاستقرار أكتر .

9- لما تستقبلي النساء في بيتك حافظي على الأحاديث الدائرة بينكم ، احكي عن (أفكار) مش عن (أشخاص).. ما تخلي بيتك مقرّ للغيبة والنميمة والحكي في أعراض الناس .

10- لما يجييكي ضيوف جهزي الضيافة كلها قبل ما يييجوا ، ميشان ما تضللك رايحة جاية ع المطبخ وتعرفي تقعدي معهم وتديري نقاش حلو .. .

11- تسمعيش لتعليقات الآخرين وانتقاداتهم لحياتك وتنكدي على حالك .. هما فعليا بيكونوا حاسدينك بس الموضة الجديدة (ما أحسدك عيني عينك .. خليني أسم بدنك)

12- اجعلي بيتك وزوجك أولويتك الأولى ورتبي بعدهم الأولويات التانية ؛لإنه هما اللي رح يضلولك بعد رحلة بحثك عن تحقيق ذاتك .

13- اصحي من النوم مبتسمة ومتحمسة ، بعد فترة بيتك هيشبهك .

14- لوّني حيطان بيتك بألوان زاهية ومشرقة ، الحياة ألوان .

15- لمّا تحبّي زوجك فعلا هتحبي كل متعلقاته من:( أهل وعمل وأصدقاء أو حتى أطفال من زواج سابق)

16- الرجال ما بيشبهوا بعض ، يعني ما تعاملي زوجك متل ما أختك بتعامل زوجها (تعاملي معه بناءً على تصرفاته معك بس)

17- ما تقضي (كل) نهارك في تنظيف البيت والطبخ .. إنتِ "ربّة أسرة" مش "خادمة" ، إنتِ "كيان" مش "آلة تنظيف"

18- شاركي زوجك (أحلامه وأفكاره) واتركيه يشاركك أحلامك ومخططاتك المستقبليّة ، واحلموا بحياتكم الجاية سوا .. واتناقشوا بـ (أفكار) مش بـ (أغراض البيت) بس .

شفتي : الخادمة بتعرفش تعمل هيك .

19- البيوت أسرار .. مش ضروري كل الدنيا تعرف إنه زوجك بيساعدك بتنظيف البيت أو حتى إنه عنده مناوبة اليوم في شغله .

20- اقرئي كتب عن الحياة الزوجية واحضري برامج أسرية تثقفي فيها