" كلنا منعرف "
" كلنا منعرف "
بقلم: براء العوري.
كلنا منعرف كتير شغلات وشايفينها حوالينا بس ساكتين عنها أو بالأحرى الناس يلي عم تصير معهم هالأشياء بسكتو وبخافو يحكوها، طب ليش؟؟؟
أنا بحكيلكم ليش، بخافو من القيل وقلنا، بخافو من حكي الناس لإنو هاد البعبع يلي مخوفهم ومخليهم يسكتو...
كلنا منعرف إنو فيه كتير بنات نغصبو بجيزتهن وما تجرأن يحكين لأ، يعني كيف بدها تكسر كلمة أبوها ويطلع قدام العالم مش زلمة!!!! أو ممكن يقولو عنها حاطة عينها ع شب تاني أو فيها عيبة...
أنا وإنت وهي وهو وهم وهن كلنا منعرف كم بنت عايشة بذل وإهانة في بيت جوزها وبتنضرب كل يوم قدام ولادها والجيران بسمعوها وهي تصرخ بس قاعدة في بيتها بالجوع والقلة لانو مش بس ولادها كاسرين ضهرها وما بدها تتركهم، لا لانو ما في حد تتحامى فيه ما في مكان امن للجوء حتى بيت ابوها متخيلين ولانها عارفة اول جملة رح تسمعها من اهلها انو انتي بنت راسك قاسي وما بتسمعي كلام جوزك واكيد عملتي شي غلط ومش بتردي ع جوزك...
كتير بنات ما درسن تخصص بدهن ياه لانو امها او ابوها حكولها شو بدك تدرسي ممرضة وضلي لنصاص الليل دايرة ولا بدك تكوني محامية عشان ينحكى عليكي زلمة وصوتك طالع ولا ليكون صحفية ضلي اطاردي ع الحواجز متل حسن صبي ويجيكي طلق طايش في راسك بالاخر، روحي ادرسي معلمة بتروحي الضهر وبتعملي طبختك واحسنلك لما تتجوزي، وغير هيك أقعدي صفي في الدار يعني هيك يلي بصير ببساطة...
كم بنت تجوزت عشان ما ينحكي عنها عانس وهلأ عايشة تعاسة ما حد بعرف فيها الا ربنا وطبعا الناس ما بهمهم شو عايشة ومش سائلين عنها....
كلنا منعرف بس مش قادرين نحكي...
وكلكم مقتنعين بكلامي انو صح مية بالمية ويوم يوم بتشوفو يلي بحكيه مش شرط يصير معكم لكن بصير في محيطكم...
أنا بعرف كتير بنات بتمنى الزمن يرجع فيهن لورا ويرجعن يكملن تعليمهن وينطلقن بس بعد فوات الأوان، والسبب انو ما كملن تعليمهن لإنو كان اخوها الكبير يضربها ويحرمها من كل شي ويتحكم بكل تفصيل بحياتها من لبس وأكل وطلعات وغيرو، فلما يئست وزهقت من حياتها وأجاها ابن حلال حكت بينها وبين حكالها يلا بتجوز وبرتاح من هالعيشة ما كانت تعرف انها رح تطلع من تحت المزراب وتروح تحت الدلف...
كلهن بعرفن ومن جواتهن بدهن ينفجرن من القهر والظلم والكبت بس الخوف هو سيد الموقف الخوف من الناس وكلامهم، الخوف يصيرو ينادوها مطلقة، هاي أكيد جوزها طلقها لانها ما عرفت تستر حالها اكيد لو فيها خير كان جوزها ما طلقها....
ليش تكوني مخلوقة ضعيفة ومثيرة للشفقة، كوني إنتي بقوتك وتذكري تعليمك هو سلاحك وإحنا في مجتمع بحسب ألف حساب للمرأة المتعلمة والمثقفة....
إحنا مجتمع حافظ مش فاهم، إحنا مجتمع بخاف من كلام الناس قبل مخافة ربنا للأسف...
المجتمع بعرف البنت هيك بين قوسين ( فستان أبيض، تابع، ظل، طبخ، نفخ، شطف، جلي، بيت، أطفال، كفن )
يا عمي ويا خالتي لما تكونو مربيين بنتكم منيح وتزرعو فيها مبادئ وأخلاق رائعة وبتركنو عليها شو بدكم بكلام الناس....
صونو البنات ورفقا فيهن ديرو بالكم عليهن إكرموهن إسعدوهن خلوكم سندهن ومصدر قوتهن، لإنو بكرة فيه رب كبير رح يحاسبكم عن كل دمعة ولحظة حزن مرت فيها بنتكم....
ويلي بحكي هم البنات للممات بحكيلو "يلي ما خلف بنات ما حد دري عنه لما مات".
البنات هن الحنان والطيبة والوفاء والإخلاص وسند الأهل لما يكبرو...
07/03/2019 12:31 pm 6,197